‘ராயன்’ திரைப்படத்திற்கு கிடைத்த சர்வதேச அங்கீகாரம் – முரட்டு குஷியில் படக்குழு..!!

தனுஷ் இயக்கி நடித்துள்ள ராயன் திரைப்படம் திரையரங்குகளில் வெளியாகி வெற்றிநடைபோட்டு வரும் நிலையில் தற்போது இப்படத்திற்கு சர்வதேச அங்கீகாரம் கிடைத்துள்ளதாக படக்குழு அதிகாரப்பூர்வ அறிவிப்பை வெளியிட்டுள்ளது.

திரையுலகில் அசர வைக்கும் நடிகராக , பாடகராக , பாடலாசிரியராக கலக்கி வந்த நடிகர் தனுஷ் ராயன் என்ற அவரது 50 ஆவது திரைப்படத்தின் மூலம் வெறித்தனமான இயக்குநர் என்ற அந்தஸ்தையும் பெற்றுள்ளார் .

சன் பிக்சர்ஸ் நிறுவனத்தின் பிரம்மாண்ட பொருட்செலவில் தயாரான இப்படத்தின் தனுஷுடன் சேர்ந்து சந்தீப் கிஷன் , காளிதாஸ் , பிரகாஸ்ராஜ் , எஸ்.ஜே.சூர்யா, துஷாரா விஜயன் , அபர்ணா பாலமுரளி , சரவணன் உள்ளிட்ட ஏராளமான நட்சத்திரங்கள் நடித்துள்ளனர்.

இசை புயல் ஏ.ஆர்.ரகுமான் அசத்தலான இசையில் தரமாக தயாரான இப்படம் கடந்த 26 ஆம் தேதி உலகெங்கும் உள்ள திரையரங்குகளில் வெளியாகி தற்போது ரசிகர்களின் தாறுமாறான வரவேற்பை பெற்று வருகிறது .

இந்நிலையில் மக்கள் கொண்டாடும் வெற்றிப்படமாக உருவெடுத்துள்ள ‘ராயன்’ திரைப்படத்தின் திரைக்கதை ஆஸ்கர் அகாடமியின் நூலகத்தில் இடம்பெற தேர்வாகியுள்ளதாக படக்குழு அதிகாரப்பூர்வ அறிவிப்பை வெளியிட்டுள்ளது.